Domenic Neuhäusler-Fausch____

Eine Episode aus dem Clubleben...

Z'vergässne Clubmitglied

Wiä all Jahr sind di Gatschieferer uf en Clubtour und zwar heindsch en Bergtour geplanet. Am Samstig wäri grächnet gsin über d'Jöriflüelafurgga ga Vereina z laufä, dörtt im Bärghus zübernachte und am Sunntig den zum Gitzihöreli und über Gatschiefer ins Schäderloch aper stürchle.

Dr Wätterbricht hed denn uf de Samschtig hundschwiileid goldä kann! Mä isch tue rätig chon, dass mä halt am Samsschtignammitag mit dm Bus in gä Vereina fahri und am Sunntig chömme de ja usserlaufe!

Z Tagsch druf ischt mä denn wie gseid, uf den Bus, die sportlich anghuchte händ schi denn entschlosse, "schi gangendi z Fuess uf dän Iwäg!" Uf em Iwäg, wo mä näbet dm Höhwald verbigfahre ischt, hed mä dört en Rucksack gsehn liggä, aber vore Person wiit und breit kei Spur.

Wo mä denn dinne achon ischt, heind denn alli weidli eis gän triche müesse, die Ifahrete hed halt unheimli Durscht gän. Die wo ingloffe sind, heindschi denn au sofort gmüetli gmachet.

Alli sind hollibolli gsin, aber z mal rüeft eine in d Rundi: "Da fehlt doch äs wär! Ja bigoscht, da fehlt äs wär!! Dr Rucksack bim Höhwald!!! Z Amalie heimär vergässe!!!!"

Due ischt denn di Telifonierete losgange, mä hed z Amalie zum Gfell verwütscht. Schi hei au eswas vergässe und sii drum nochemal ins Hus zrugg, wiesch usserchommi, heisch grad dn Bus hinderem Egg verschwinde gsehn. Oh, verflixt heisch gädeicht, aber z Fuess eso allein, nei säb mögisch nid uf de Wäg. Zum guete Glück hed denn Köbi, ünsche Gaschtgeber, es Isähe kann und ischt z Amalie gän hole, vergälts Gott Köbi.